Магистр деген ким?
Магистр ‒ магистрдик окууну аяктагандан кийин бүтүрүүчүлөр тарабынан алынган квалификация.
«Магистр» квалификациясы тандалган профиль боюнча теорияны тереңирээк өздөштүрүүнү жана магистрантты тандалган багыт боюнча илимий-изилдөө, педагогикалык жана аналитикалык ишмердүүлүккө даярдоону карайт.
Анын ишмердүүлүгүнүн негизги түрлөрү: илимий жана колдонмо изилдөөлөрдү жүргүзүү, багытка тиешелүү дисциплиналарды окутуу, аналитикалык жана кеӊеш берүүчү иштерди жүргүзүү. Магистрдин кесиптик ишмердүүлүгүнүн чөйрөлөрү: илимий-изилдөө уюмдары, кеӊеш берүүчү фирмалар, орто кесиптик жана жогорку окуу жайлары, мекемелердин жана уюмдардын аналитикалык бөлүмдөрү.
Күндүзгү окуу түрүндө магистратура программасын даярдоонун нормативдик мөөнөтү 2 жылды, ал эми сырттан окуу түрүндө 2,5 жылды түзөт. Бирок, ага чейин студент бакалавр даражасын (4 жыл) алышы керек. «Магистр» квалификациясы Мамлекеттик аттестациялык комиссиянын жыйынында магистрдик диссертацияны коргоонун жыйынтыгы боюнча ыйгарылат жана докторантурага жана аспирантурага тапшырууга укук берет.
Төмөнкүлөрдү билүү зарыл:
«Билим алуучулар төмөнкүлөргө милдеттүү: билим берүү программасын ак ниеттүүлүк менен өздөштүрүүгө, жеке окуу планын аткарууга, окуу планында же жеке окуу планында каралган окуу сабактарына катышууга, сабактарга өз алдынча даярданууга, билим берүү программасынын алкагында педагогикалык кызматкерлер тарабынан берилген тапшырмаларды аткарууга» (Кыргыз Республикасынын 2003-жылдын 30-апрелиндеги №92 «Билим берүү жөнүндө» мыйзамынан).
Университеттин миссиясы: «Эл аралык деңгээлде таанылган, эркин ой жүгүрткөн, өзгөрүүлөргө ачык, билимди коомдун өнүгүүсү үчүн баалуулуктарга айландыра алган адистерди даярдоо».
Магистратура программасы — тиешелүү тармактарда терең фундаменталдык жана кесиптик даярдыктын негизинде кесиптик билимдерди, билгичтиктерди жана көндүмдөрдү алууну болжолдогон жогорку билим берүү программасы.
Магистратурадагы билим берүү процесси окуу планына жана календарлык окуу графигине ылайык уюштурулат.
Окуу планы — бул билим алуучулардын окуу мезгилдери боюнча дисциплиналардын, практикалардын, окуу ишмердүүлүгүнүн башка түрлөрүнүн жана аралык аттестация формаларынын тизмесин, көлөмүн, ырааттуулугун жана бөлүштүрүлүшүн аныктоочу документ. Магистратура программаларын ишке ашырууда билим берүү программасынын мазмунун жана окуу пландарын түзүүнүн модулдук принцибине негизделген билим берүү процессин уюштуруунун баллдык-рейтингдик системасы (БРС) колдонулат. Учурдагы окуу жылы 2 семестрге бөлүнөт, алардын ар бири сынактык сессия менен аяктайт.
Ар бир магистрантка магистратуранын биринчи курсунда окуу башталгандан бир айдын ичинде илимий жетекчи дайындалат, ал: — магистранттын билим берүү жана илимий ишмердүүлүгүнө магистратурада окуунун бүткүл мезгилинде түздөн-түз жетекчилик кылат; — магистрант менен биргеликте жеке иш планын түзөт жана анын аткарылышын көзөмөлдөйт; — магистрдик диссертацияны даярдоого жетекчилик кылат.
Магистратурада окуу магистранттын жеке иш планына ылайык уюштурулат, ал окуу планынын негизинде магистратуранын биринчи курсунда сабактар башталгандан кийин бир айдын ичинде иштелип чыгат. Магистратуранын деканы тарабынан бекитилген магистранттын жеке иш планы магистратуранын деканатында (түп нускасы) жана магистрантта (көчүрмөсү) сакталат.
Магистратурада окуунун бүткүл мезгилинде илимий-изилдөө иштери (мындан ары – ИИИ) жүргүзүлөт. Ар бир семестрдеги ИИИнин формалары жана мазмуну магистранттын жеке планында көрсөтүлөт.
Бүтүрүү квалификациялык иши (магистрдик диссертация) (мындан ары – БКИ) магистранттын илимий жетекчисинин жетекчилиги астында магистратурада окуунун биринчи жылынан баштап аткарылат. Магистрантка БКИнин темасын тандоо укугу берилет.
БКИ рецензияланууга тийиш. БКИ жактоого билим берүү программасынын бардык талаптарын толук аткарган жана мамлекеттик сынактарды ийгиликтүү тапшырган (эгерде алар мамлекеттик жыйынтыктоочу аттестациянын курамына кирсе) студенттер гана киргизилет.
Мамлекеттик жыйынтыктоочу аттестациядан ийгиликтүү өткөн магистратуранын бүтүрүүчүлөрүнө мамлекеттик сынактык комиссиянын чечиминин негизинде жогорку билим жөнүндө жана квалификация жөнүндө документ – магистр диплому берилет.
Модулдук-баллдык-рейтингдик система (МБРС) деген эмне?
Билим алуучулардын окуу жетишкендиктерин баалоонун модулдук-баллдык-рейтингдик системасы – бул билим берүү программаларын өздөштүрүүнүн сапат деңгээлин камсыз кылуучу иш-чаралардын комплекси.
Баа окуу иштеринин айрым түрлөрү боюнча, дисциплина боюнча, модулдар боюнча 100 баллдык шкала боюнча AVN билим берүү порталы аркылуу коюлат.
Ар бир дисциплина магистранттардын логикалык билиминин аякталышы болуп саналган модулдарга бөлүнөт.
Ар бир дисциплина боюнча алынган упайлардын негизинде магистрант рейтингде белгилүү бир позицияга ээ болот, ал семестр ичинде топтолгон упайлардын жалпы суммасынын орточо арифметикалык жыйынтыгы болуп саналат.
Предмет боюнча жыйынтыктоочу баа алынган упайлардын суммасы болуп саналат жана ал сынактагы жооп үчүн гана эмес, семестр ичиндеги учурдагы иштин жыйынтыгы боюнча да коюлат.